港島大浪灣

相信各位車友都會經常去遊車河聖地石澳睇下海hea下，但係有無試下轉去大浪灣打個白鴿轉呢？今次小編就帶大家睇下呢個衝浪聖地有咩新發現啦！

揸車去beach party 另一好選擇！

石澳既車位成日爆不嬲就是常識吧！如果各位車友發現等左好耐位都無得泊，不妨揸過黎大浪灣碰下運氣。假期日子下午我地分別去左石澳同大浪灣，相比石澳呢度有太多泊位了吧！不過分別就係呢度係錶位，需要兩個鐘入一次錶。

跟住指示沿路下斜坡就會見到幾間士多，下面就係大浪灣海灘了。

燒烤場

小編太耐無去過大浪灣了(汗), 沿路行緊落海灘先發現原來大浪灣既爐係咁新咁靚嫁！可惜既係新爐不多，要霸就要早少少啦。

呢個區域既爐附近重有兒童遊樂場提供比小朋友玩，家長們就唔怕小朋友周圍走要看住啦。

廁所就係不遠處，要清潔打水都好方便。

如果咁唔好彩呢個區域既爐都爆左，海灘既左面都有一個燒烤區，不過就得個爐，重有幾張黃色既枱(其實唔多似枱lol)，會比較唔方便。

  

衝浪吧！朋友們！

大浪灣當然係名不虛傳地大浪啦，尤其係秋冬時份，所以都吸引好多滑浪人士係度衝浪。要注意既係呢度在部分時間係無救生員當值（泳灘資訊），家長要睇住小朋友之餘自己都要小心呀。

係附近士多都有得租借衝浪同游泳用品

相比石澳，大浪灣既沖身格數相對較少

沙灘既沙都係非常細滑，可以同小朋友一齊堆下沙

大浪灣泳灘資訊

救生員當值時間

4月至5月	6月至8月	9月至10月
上午9時至下午6時	星期一至五 上午9時至下午6時星期六、日 和公眾假期 上午8時至下午7時	上午9時至下午6時

11月	12月至2月	3月
上午8時至下午5時	泳灘救生服務暫停	上午8時至下午5時

查詢電話 2809 4558

大浪灣泳灘 （康樂及文化事務署網站）

大浪灣泳灘水質（環境保護署網站）

行埋個古代石刻

大浪灣其實就係遠足路線港島徑既終點，連接住土地灣，姐係成日見人地行既龍脊啦！位於大浪灣既岸邊重有一個已列為法定古蹟既古代石刻，相信是早期以海為生的居民，在海濱刻石以求鎮撫怒海、保佑居民出海作業之用。既然一場黎到，緊係要落去睇下啦！

係海灘左面既燒烤場一直行入去就係啦

沿途重有少少既岩石，我地都見到有釣魚人士係度垂釣，不過亦有指示牌叫人唔好靠近。

沿路一直行落去就係啦

小編太掛住自己集郵，都唔記得影低石刻既風貌，唯有用網上既圖補數啦

總結

我確實幾鐘意去大浪灣，貪呢度無咁多人亦唔洗同人周圍逼，少許缺點就係要行一段落入去同埋要入錶( 呢個真係會容易忘記), 但其他設施都非常齊全，如果各位車友下次去海灘既話不妨考慮下大浪灣啦！

如何前往

泊車

至少30個咪錶位既停車場

交通工具

由筲箕灣開出：
星期一至五（公眾假期除外）：	07:00、08:00、12:00、12:54、13:48、14:42、18:36、19:12、19:30、20:00、20:20、21:20、22:00、23:00、23:30、00:00
星期六（公眾假期除外）：	07:00、08:00、12:05、12:55、13:45、14:45、18:35、19:15、19:35、20:00、20:20、21:20、22:00、23:00、23:30、00:00
星期日及公眾假期(十二月初至五月中旬)：	12:05、12:54、13:50、14:46
星期日及公眾假期(其他日子)：	12:00、12:54、13:48、14:42、18:38、20:05
由此站開出，經石澳往筲箕灣：
星期一至六（公眾假期除外）：	15:48
星期日及公眾假期（只適用於泳季期間）：	14:03、14:33、15:00、15:30、16:00、16:30、17:00、17:30、18:00