大美督六大玩樂提案

假日一到就緊係想同家人朋友過一個休閒週末啦! 想由朝玩到晚既話, 大尾篤 (又名大美督) 既玩樂設施真係一應俱全! 由大埔市區揸車入去都係大約 20分鐘左右, 泊位夠多(不過易爆,週末亦有排塞入去); 而且上山下海踩單車活動係曬一個地方, 夠曬集中! 今次就等小編一次過列曬係大尾篤可以做既休閒活動啦!

跳到玩樂提案

泊車資訊

好多人都知道㨁車黎到大尾篤都貪呢度有個大停車場, 不過唔講唔知呢度原來有一部分車位無咪錶 (免費泊車), 而呢一部份位於一入停車場既右面三行;

不過呢兩行位好易一早比人霸左, 其他錶位都係八蚊一個鐘姐。 要留意呢度假日好易比人抄牌 (小編有一次懶得行出黎就奶左野),  記得準時入錶啦!

遊車河資訊

好多人都鐘意由大埔出發, 經大尾篤及新娘潭路往鹿頸食茶記; 如果想黎個新界區晨操既話不妨考慮下呢個路徑 (不過記住精神夠先好行呀! ), 各位都可以參考下網站內鹿頸有咩做嫁!

大埔起點 → 大美督 → 新娘潭路 → 鹿頸 → 粉嶺終點
玩樂提案

提案一: 自備食物BBQ

大尾篤最出名就緊係燒野食啦! 呢度既燒烤爐夠曬多又夠新淨, 要補給食物飲品又有好幾間士多 (不過通常都預多左lol); 停車場隔離既燒烤場屬於食環署管理, 總共有40組燒烤爐; 目測比較容納多D人同新淨。建議泊左錶位既朋友係呢度搵位燒野食

公廁都係幾步之遙, 出面重有水龍頭方便燒烤人士

燒烤場望住既海景; 黃昏時間重可以睇到日落景致

係燒烤場隔離有幾間士多仔, 如果食物飲品唔夠都可以係度購買, 覺得買野食麻煩既重可以係度買燒烤包添!

2016年3月既價錢大約係 208蚊兩位, 878蚊四位全包(炭, 食物, 蜜糖等)

如果呢個燒烤場都係無位的話, 可以沿往船灣淡水湖壩頂單車路行到另一個由漁農署管理既燒烤場, 需時15分鐘左右;

穿過曬食環署燒烤場同士多後一直沿呢條路

見到呢個迴旋處後, 建築物既右面就係燒烤場既入口啦!

漁農署燒烤場共有65個燒烤爐, 相對較出面既爐位舊, 餐枱亦較少; 但適合一大堆人黎BBQ, 因為燒烤爐集中之餘地方夠大, 搵位亦比較容易;

場地內都有一個小食部, 選擇較出面少; 廁所就係小食部隔離, 非常方便。

如果想兩手fing fing 乜都唔帶就去BBQ 的話, 入大美督沿路都有好幾間選擇, 以下就係小編食過, 而且有得泊車既燒烤場 (Openrice 連結)

大尾篤麥師傅

巴希雅海灣重慶燒烤 (需要提前預約)

需要注意既係, 以上兩間燒烤場都離船灣淡水湖有一段距離嫁!

提案二: 划艇浪漫遊(2020update)

相信大美督係全港最容易到達既海邊划艇地點啦! 租艇又夠簡單方便, 重有提供救生衣, 唔識游水既朋友就唔怕啦!

係燒烤場邊既士多都有租艇服務, 閒日二人艇價錢大約係一個鐘30蚊一小時 (不含按金), 四人艇就好似60蚊左右

依家重新增左有水上單車

2人水上單車星期一至六＄100

星期日及 公眾假期＄120

拎好救生衣就行去士多對出既碼頭拎艇啦!

如果怕曬既朋友可以另租太陽傘, 但係因為西斜關係, 其實我覺得唔係好遮到太陽…… 所以租借與否就自行選擇啦!

提案三: 踩單車親子樂

由細就大, 踩單車呢個活動既終點通常都選擇係大美督, 只因船灣淡水湖壩頂既景色真係太靚了! 宜家有車出入之後就唔可以係馬鞍山踩入去….. 唔緊要! 大美督真係無野多, 單車舖最多!

今次小編就同男朋友係呢度租左架三人家庭車, 盛惠80蚊一日, 兩小時60蚊 洗唔洗按金就唔多記得lol

我地沿住燒烤場邊既單車路踩到船灣淡水湖, 壩頂能夠遠眺馬鞍山, 夕陽之時同湖邊景色相輝映, 真係令人不禁停低欣賞多陣呀!

提案四: 家樂徑行山

划艇踩單車呢D活動就聽得多, 估唔到大美督重有一條家樂徑喎! 起終點位於船灣淡水湖壩頂入口既左面

行完一周大約40分鐘左右, 行到最高點既風景台上更可以俯視船灣淡水湖的主壩，以及八仙嶺、鹽田仔同馬鞍山既景色添!

提案五: 慈山寺觀賞戶外觀音

位於洞梓既慈山寺由李嘉誠投資, 用左15億建成既唐代風格寺廟, 入面76米高既寶瓶觀音更加係全球第二高既戶外觀音。寺廟由2015 年開始對外開放, 但係需要首先係網上預約; 小編曾經試過預約, 週末都要一個月後先至有位。所以想黎到寺廟既朋友, 記住首先係以下網址預約啦!

https://www.tszshan.org/home/new/zh-hk/visit.php

提案六: 龍尾灘游水

龍尾灘係大尾篤龍尾村前的泥灘，現被改為一個人工沙灘,係大埔區第一個泳灘, 水質達到環保署嘅一級標準

如何前往

前往大美督停車場地圖

交通工具

巴士 75K 大美督 – 大埔墟鐵路站

巴士 275R 大埔墟鐵路站 – 新娘潭 (只限星期日及公眾假期服務)

專線小巴 20C 大埔墟站 – 大美督