相信各位狗主都好難搵到一個好大好靚既公園比自己既寵物跑黎跑去; 數碼港海濱公園就真係各位狗仔既天堂啦! 呢度沿海大草地可以比佢地跑跑跳跳, 亦有好多人黎到公園野餐嫁~ 而且呢度泊車方便, 行幾步就到公園, 重可以係海邊見到日落景致, 大家就可以帶埋食物黎, 坐係大草地野餐食住等啦!
泊車錶位多, 夠方便
係數碼港泊車有兩個地點, 第一個就係海濱長廊門口既兩小時錶位,小編就咁睇已經有20 個以上, 呢個位置比較方便狗主們
*注意: Google map 地圖為雙黃線, 但小編於2016年11月去既時候此地點已經有泊車錶位 (上圖)
而另一個就係數碼港商場, 商場內單一消費滿一百元會有一小時免費泊車, 二百元就有兩小時, 免費泊車適用於數碼港1, 2, 3號停車場; 而停車場收費一小時18元。如果想去海濱長廊既話, 數碼港1座商場會比較近。詳情可以到數碼港商場網站睇睇
臨海野餐大草地
數碼港海濱長廊佔地50,000平方米, 港島休憩地方黎講真係好大; 放眼過去都係已修葺好既草地, 而且沿海而建, 假期黎到呢度野餐真係一流呀
草地望出去就係海邊, 好天既時候重可以見到咁靚既日落
如果有怕狗既朋友都唔洗驚! 海濱公園入口既右方係唔比狗仔入園既草地, 相比寵物公園個邊少人好多
呢度都設立好多小朋友既玩樂設施, 例如係小型(真係好小型)既足球場同數碼化(不過好似壞壞地) 既益智設施
寵物公園 – 狗仔開心樂園
數碼港海濱公園屬於寵物公園, 周圍都可以見到好多狗狗係度散步
寵物公園既配套都好完善, 周圍都有呢類狗糞垃圾筒同寵物公園既守則
美麗日落Check point
公園既沿海位置亦可以欣賞數碼港既美麗景色嫁! 岩曬情侶們黎呢度行下hea 下等日落
數碼港商場
由海濱公園右面位置係其中一個數碼港既商場既入口, 大家想去洗手間就可以係呢度行上去, 見到婚紗店既左面就係啦
商場入面既食肆選擇就較少, 有一個 food court ,麥當勞同超市; 如果即興黎到數碼港野餐既話, 可以黎到呢度補給
呢度都有一個大型既玩具店同戲院, 週末同小朋友黎到數碼港行下都係一個幾好既選擇黎嫁!
如何前往
前往數碼港海濱公園 (錶位位於資訊道)
交通工具 (每日服務)
巴士 30X → 中環交易廣場 , 73 → 赤柱監獄, 970 → 蘇屋邨
小巴 10, 10S, 69X → 銅鑼灣（崇光）, 69 → 鰂魚涌（船塢里）, 69A → 黃竹坑站
數碼港海濱公園開放時間
星期一至日 早上十時至晚上十時