泥涌石灘

秋天一到, 天氣都特別舒適怡人; 又係時候同另一半出去著得好好睇睇咁影靚相啦! 要上山下海幾個鐘的話, 容乜易個妝都溶埋要補補佢嫁! 今次介紹既西貢泥涌石灘有出曬名既斷橋同天空之鏡美景, 而且由落車地點行到灘邊都係五分鐘, 重有大把位比車友泊車; 位於灘邊既年明路重係影車既好地方添!

泊車地點位多又近

泥涌係路段上位於馬鞍山同西貢中間既西沙路位置; 但石灘其實係由大埔區議會管理 (我都覺得好奇怪lol)。距離石灘五分鐘到, 係西沙茶座附近既西沙路就有一個大型既泊車錶位, 小編係假日下午黎到都幾多位泊

停車場旁邊就係洗手間, 如果想順便洗車的話都可以係呢度裝水

前往石灘方法

真係未黎過都唔知石灘既入口咁隱蔽; 首先行到停車場後面既巴士站

行到差唔多到巴士站就向左面望 (箭咀位置); 就會見到一條隱蔽小徑行落去石灘

沿住小徑行兩分鐘到會見到左面一條明渠, 再繼續沿渠邊走就到達石灘

明渠既水流清澈, 細望之下會見到好多魚毛仔係度游嫁!

影靚相, 天空之鏡Get!

行多一陣就到泥涌石灘啦! 用iPhone影相已經影到蔚藍天空既倒影

泥涌既標誌就係下圖既斷橋啦! 好多人黎到呢度影相就係用呢條斷橋配大海作背景, 而且人少少可以影到滿意為止

小編因為無著水靴既關係, 無行到灘邊影相, 只能遠距離影幾張相。斷橋因為日久失修, 橋上佈滿蠔殼: 而目測橋邊既泥土可能比較鬆軟, 如果想同另一半行到斷橋附近影相就記住要小心衣著, 以及選擇係潮退既時間先影相啦! 如果想知道呢區既潮汐資料, 可以睇下天文台既網站:

香港潮汐預報 (圖中橫向係時間, 直向讀數較低就係潮退時間)

另外一個影相地點位於石灘向海既最左面既碼頭, 到達石灘後要一直向小路行

直到見到一個燒烤餐廳同廁所, 再沿紅色路段前行

左手面就係泥涌碼頭啦, 翻睇以前既相, 原來區議會係呢度都做過翻新

呢個碼頭都唔少人係度撐起太陽傘釣魚

由碼頭影回石灘既景觀都好靚嫁!

秋高氣爽放風箏

涼風送爽, 立即諗到秋天係一個放風箏既好時節; 泥涌一向都係放風箏既熱門地方, 行到石灘既中段部份已經見到好多專業玩家坐定定, 擔定把太陽傘係度放風箏。

專業玩家們既風箏通常都係紅色, 比較容易辯識; 漫天風箏加上浮雲確是另一番景致

如果黎到心郁郁都想落場做個業餘風箏手, 灘邊既涼亭時有一位叔叔係度售賣風箏及其用具, 咁就唔會白行一趟啦!

紅樹林摸蜆樂

泥涌位於鹹淡水交界, 係面向吐露港既濕地地區, 所以灘邊擁有紅樹林同貝類生物; 一到摸蜆旺季, 人們就會帶定工具同小朋友到石灘挖蜆。如果揸埋車黎會更方便

係石灘邊既行人路有樹蔭同涼亭, 小朋友們挖得攰都可以到旁邊休息

大家想襯潮退個陣挖蜆都可以睇番天文台網站選擇適合既時間黎到呢度嫁!

影車地點年明路

由年明路進入小路的Google map

泥涌石灘旁邊亦都可由年明路旁既小路進入, 有車友都會揸到呢度同架靚車影番幾張「靚車與海」既寫真嫁! 不過今日小編架車就泊左係西沙路, 就只能影下background 比大家睇

需要注意既係小路都係比較窄同多行人經過, 車友們要小心為上

如何前往

駕車前往西沙路泥涌停車場

交通工具

99號巴士 – 港鐵烏溪沙站上車, 到泥涌站下車

299X巴士 – 沙田市中心上車, 到泥涌站下車