粉嶺流水響

要睇青山綠水，綠草如茵既景觀，唔洗去外國既！今次小編就同大家介紹下位於粉嶺八仙嶺郊野公園既流水響水塘，唔好睇少呢個水塘，其實佢係有「香港小桂林」/「香港天空之鏡」之稱，水塘邊既景致岩曬各位女仕影相影餐飽。附近前往鶴藪水塘既散步徑同行山徑長度亦適合一家大小係秋天登山，吸收下新鮮空氣嫁！

遊車河路線

本身計劃好去流水響一帶都預計要足半日，不過小編都有介紹下流水響附近既地方，可以禁入去望望:

粉嶺聯和墟出發 → 流水響水塘 → 鶴藪水塘 → 鹿頸

泊車資訊

流水響水塘對出並無任何泊車錶位，到水塘入口兩旁既馬路只能容許一到兩架車停低，係有少少窄 (如下圖)

如果需要泊車位置，最近要去到鶴藪水塘停車埸，再步行15-20分鐘到流水響水塘，詳程可以到鶴藪水塘介紹到睇睇

帶定相機，湖畔影靚相

流水響水塘係灌溉附近農田用水塘，與鶴藪水塘一樣；塘邊種植左大量白千層，三面環山。係波平如鏡既時間更加可以影到山與樹既倒影，而且係馬路開始行到水塘都係15- 30 分鐘，要近近地睇靚景黎到流水響就可以啦!

影相點No.1 湖畔倒影

到水塘入口到會見到一個水務署牌，之後一直沿斜路向上行10分鐘左右

差唔多到平地就會見到廁所，亦係附近唯一一個公廁；沿住公廁右面既路一直行就到其中一個影相點啦!

黎到呢個位置會見到有一條人行出黎既路仔，如果行落去就要小心跣親啦；落到去塘邊，咁靚既倒影立即影到！

影相點No.2 流水橋 潺潺流水

係第一點到影完相後，就要行番上去公廁，往郊野公園方向進發到流水橋

從呢個入口行到流水橋需時15-30 分鐘，呢條小徑沿塘而建，右邊係水塘，而左面就係燒烤場

無耐我地就行到流水橋啦，橋邊既小河流水聲配上太陽溫暖既感覺，真係好舒服呀!

呢度亦有分岔路行上去流水響營地

影相點No.3 白千層植林

穿過流水橋後可以一直沿湖邊道路走，經過D石枱後就黎到一片草地同植林啦！

望住呢個靚景野餐真係一流呀！係對岸影番水塘既風景亦非常一流，小編都留左係度一陣先捨得走呢

最後我地就由白千層林行番郊遊徑入口，全程大約需時1.5 小時 (包括影相)

燒烤場另一選擇

如果遇上假期旺季，鶴藪個邊既燒烤場一定好爆，買齊曬野去燒烤既朋友不妨考慮下黎到流水響既燒烤場，由郊遊徑入口行數分鐘就會到達

呢度既缺點就係無公廁係旁邊，只有旱廁；如果需要到公廁就要行一段路到入口

燒烤爐既樣子都比較舊，但係呢個燒烤場都有好多位置，唔怕無位BBQ ；垃圾筒亦係旁邊，算係方便

流水響郊遊徑

除左影相同BBQ 之外，呢度重可以行下流水響郊遊徑，各位可以選擇行上山一圈，係同一點結束或行到鶴藪水塘嫁，不過呢個活動就無咁岩有車既朋友，而我地最後都無行到

由郊遊徑入口行到鶴藪水塘需要一小時左右，而由水塘到小巴站則需要20 分鐘左右；沿途山路都幾平坦，適合一家大小嫁！兩條路徑詳細可以睇番漁農署既山徑pdf 流水響郊遊徑

公共交通工具

粉嶺港鐵站搭綠色小巴52B到中途，係呢個牌落車再步行到流水響, 每隔20-30分鐘一班