上一篇文已經係兩年前打啦lol ，呢段時間Work from Home先至有多啲時間完成埋之後嘅行程，如果想睇返大帽山嘅行程可以去返呢度，我哋繼續行程啦！
荃灣出發 → 川龍村 → 大帽山郊野公園 → 經過英雄亭 → 雷公田農場鮮奶＊ → 嘉道理農場 → 林村許願樹
由大帽山郊野公園駛到雷公田之間，就會經過英雄亭。呢個涼亭得此名既原因就係因為此亭建於落斜急彎旁邊，唔少車友都鍾意聚集喺度睇高手過彎，叫叫下就叫咗英雄亭了。大家想停下的話，google map 輸入英雄亭都可以搵到呢度。
經過石崗軍營後，駛入小路再走一段路就到逹位於錦田嘅農場鮮奶了。要注意呢度只限星期六及日開放。(更新: 2020年因疫情關係，農場暫時關閉，只有在門外售賣鮮奶)
我地係度食了公仔麵，雙皮奶同埋農場鮮奶，鮮奶真係幾新鮮，可以試下！
另外，農場入面都有貼出相關告示，如果要泊車的話就唔可以離開農場範圍，應該係避免人客將車放係車係度就出去BBQ
係沿路折返就會經過大欖郊野公園石崗燒烤場，雖然無乜景睇，而且無合法停車位置。但設有乾淨公廁，而且燒烤爐都唔少，相比其他燒烤場都比較少人，係大時大節可以考慮下黎呢度搵位。
離開農場鮮奶同石崗燒烤場後，繼續前行就可以到達呢個迴旋處，我地今次選擇行林錦公路前往林村，大家都可以去元朗方向繼續旅程
我哋都係2017年去，可能同2020年嘅情況有唔同…
林村早在宋朝末年就有人聚居, 村中生長的兩棵大榕樹被村民們視為神靈 。每到新年，好多市民都會嚟到林村，將自己嘅願望寫到寶碟上，再到許願樹前許願同拋寶碟。多年前為咗保護真正嘅許願樹，當局設置咗一棵仿真許願樹，讓各位可以照舊許願同抛寶碟。
林村內有好大塊空地，但我哋發現冇路可以入去泊車，所以最後喺村內附近短暫停一停 。 不過圍村範圍大家就要小心停錯村民個位啦！
喺許願樹嘅入口旁邊有售賣豆腐花及茶果等客家食物
見到許願樹嘅真身啦！見到仲有隻雞真係知呢段文同真係寫嘅年期差一大截啦XD
許願廣場附近都保養得幾好，有幾片綠油油嘅草地
交通：大家亦可以喺太和站坐巴士64K / 小巴25k 到放馬莆巴士站下車
今次我哋嘅遊車河就喺林村結束，附近都仲有嘉道理農場可以前往，不過泊車就需要預約，有興趣嘅朋友可以上佢嘅網站睇吓點樣預約㗎！
This website uses cookies.
