西貢燒烤場地圖(持續更新中…)

燒野食最重要係咩呀?就緊係個爐啦! 而西貢郊野公園有成50個燒烤場，多個燒烤爐, 所以去西貢BBQ都會好頭痕, 成日睇邊度有位呀? 邊度有位泊車呀? 邊度係旱廁邊度有水呀? 唔駛怕! 有左呢張西貢燒烤場好去處地圖, 內附每一個燒烤場有既設施, 大家就唔洗餐餐泊下車又見無位又要再搵位啦! 呢個POST主要介紹係西貢馬路邊,重未到禁區內(北潭涌前) 既燒烤場, 等大家睇住架車同埋拎野都比較方便D!

簡介

為左令大家更清晰以下介紹既燒烤埸，小編就先做個整合；由西貢市中心出發，一直沿大網仔路駕駛，終點為北潭涌停車埸。日後呢個post 會持續增加西貢區其他可以泊車既燒烤地點，例如係西沙路燒烤區等。

以下就列出將會介紹既大網仔沿路燒烤埸，想去邊個燒烤場就一目了然啦!

地區	燒烤場號碼	泊車數目	燒烤爐數目	頁數
大網仔	三至五號燒烤場	四至五十個	25個	第2頁
大網仔	十一號燒烤場	約四十個	11個	第3頁
北潭涌	北潭涌1-5 號場，傷健樂園	約一百個	約一百個	第4頁

如果想了解多D西貢區域有咩燒烤場，可以睇睇下面漁護署既地圖

大網仔區域

北潭涌區域

小編亦都建議大家有得泊停車場/錶位就最好啦，呢條路每逢假日警察都會黎抄一轉；如果真係要放係街邊，記住唔好阻到其他人呀!

下一頁: 西沙路迴旋處燒烤區簡介 →

燒烤區域一 (近西沙路迴旋處)

首先介紹既就係最近西貢市中心既燒烤區域啦! 呢個位置比較近西貢, 揸車第一個到既地方。呢度附近有海景, 亦都多泊車既位置, 但燒烤爐只有15個左右, 相對比較難搵位。

地圖

Google map pin 落在係最近既巴士站 (麥邊)

而下面既手製地圖劃出三個燒烤區既位置

• 泊車地點 – 2個

停車點一 – 係燒烤區旁邊有八個泊車位

停車點二 – 位於五號燒烤場旁邊, 約40多個車位

• 交通工具

呢3個燒烤場附近都有巴士站 – 係麥邊站落車 (94, 96R, 99, 99R, 299X)

1. 大網仔燒烤區四號場

• 地點 – 西沙路(地圖未能將此燒烤場定位;與三,五號場相鄰)

• 廁所 – 濕廁

另外設有洗手盆及汽水機係廁所外

• 設施

涼亭一個, 而場內附近未見有照明系統, 需要自備

呢度地方都比較空曠, 適合同小朋友一齊黎踩下單車玩下波

燒烤爐: 舊式石造燒烤爐(較矮), 大約可容納八人一齊燒烤

係燒烤爐附近都有大樹遮擋; 日間黎到呢度就唔洗曬住BBQ, 搞到大汗淋漓啦! 需要注意呢度比較熱門, 因為附近有巴士站同停車場, 而且只有3至5個燒烤爐。

方便指數 :★★★★★ (係西沙路一入黎迴旋處就到; 由西貢出發都好快到, 重有兩處停車點及巴士站)

設施 :       ★★★☆☆ (雖然有濕廁洗手盆,但燒烤爐既數量比較少, 亦無乜其他設施比大眾選擇)

熱門程度: ★★★★★ (有得泊車又有巴士到, 小編下午到個陣已經滿左)

風景:        ★★☆☆☆ (係樹蔭下燒烤係幾舒服, 但除此以外無乜風景, 要到對面三號燒烤場)

2. 大網仔燒烤區三號場

• 地點 – 西沙路(地圖未能將此燒烤場定位; 與四,五號場相鄰)

三號場咁岩就係四號場對面, 過一條馬路就到

• 廁所 – 濕廁 (需要走到對面四號燒烤場)

• 設施

三號場設施同四號燒烤場共享 (姐係行番過對面~), 而燒烤爐都係舊式石造燒烤爐。

呢區都係有3-5個燒烤爐左右, 下午既時候齊集好多印傭係度gathering; 場內亦未見有照明系統

燒烤場對住海邊, 睇住無敵海景燒野食係正D既!

呢度地方尚算乾淨, 但見到草地上有D牛屎…..各位要小心踩中地雷啦

方便指數 :★★★★★ (係西沙路一入黎迴旋處就到; 由西貢出發都好快到, 重有兩處停車點及巴士站)

設施 :       ★★★☆☆ (濕廁洗手盆要走過對面, 而燒烤爐既數量比較少, 設施係曬對面四號場)

熱門程度: ★★★★★ (有得泊車又有巴士到, 小編下午到個陣已經滿左)

風景:        ★★★★☆ (係椰林樹影下望住個海景燒野食感覺緊係舒服好多啦)

3. 大網仔燒烤區五號場

• 地點 – 大網仔天后古廟旁(與三,四號場相鄰)

• 廁所 – 濕廁 (需要走到四號燒烤場, 相對較遠)

• 設施

呢個區域都係只有3-5個燒烤爐, 然而呢度座落係天后古廟旁邊

係天后廟行入少少亦有幾個燒烤爐(矮爐), 爐與爐之間間隔頗大, 而且面向海邊

係呢度外面有一塊小草地, 但需要小心呢度都好多牛係度

呢個區域燒烤既好處係比較近一個大型停車場

方便指數 :★★★★★ (大型停車場就係隔離)

設施 :       ★★☆☆☆ (濕廁洗手盆要行到幾遠下, 而燒烤爐既數量比較少)

熱門程度: ★★★★☆(泊車地點係正隔離)

風景:        ★★★★☆ (亦都可以面對海景燒野食)

下一頁:大網仔燒烤區簡介 →

燒烤區域二 (大網仔巴士站旁)

繼續往北潭涌方向駛去，就會經過大網仔巴土站；呢度隔離就有一個燒烤場

地圖

Google map pin 落在係大網仔巴士站

泊車地點：一個

呢個地點勝在有一個大型免費停車場 (約四十個車位)，係weekend 期間呢條大網仔路成日比人抄牌，泊係呢個位置就唔洗驚啦！

• 交通工具

呢度可以搭巴士係大網仔站落車 (94, 96R)

1. 大網仔燒烤區十一號場

地點

背向士多行出停車埸後轉左行落斜路即可到達

• 廁所 – 濕廁 (需要行回停車場)

呢個廁所都比我搵得耐啦，原來佢係士多右邊既樓梯行落去

落一小段樓梯後，向左望就見到啦！

• 設施

小編個人認為呢個燒烤場都係一個次選，因為無乜設施之餘D廁所又要行得遠，唯一較好既地方係附近有士多；所以我會去到真係真係無泊車位先簡呢度

呢度共有十一個燒烤爐，爐與爐之間間隔頗大，無乜壓逼感

燒烤場旁邊都有一大片石地，可供大家進行一些小活動；但係石地出面就係馬路，要小心睇住小朋友呀！

方便指數 :★★★★☆ (大型停車場行三分鐘，但只有一至兩架巴士到達)

設施 :       ★★☆☆☆ (濕廁亦要行到幾遠下, 而燒烤爐既數量亦一般)

熱門程度: ★★★☆☆(泊車地點係附近，但無乜風景可言)

風景:        ★★☆☆☆ (周圍都係樹林)

下一頁: 北潭涌燒烤區簡介 →

燒烤區域三 (北潭涌燒烤埸)

北潭涌燒烤埸大致分為兩個地方，北潭涌燒烤區同傷健樂園，兩個地方相距十分鐘路程左右

地圖

Google map pin 落在係北潭涌停車場

泊車地點：一個

北潭涌係其中一個非常熱門既停車場；小編略略數過約有一百個車位左右，而且呢度係禁區入口以及大型燒烤場附近，臨近跑步比賽同秋天的話，一個早上就會爆滿，所以計劃左係附近燒烤既朋友要盡早到達呀！

如果真係無位，而你地又好想係呢區燒烤的話，亦可睇睇對面保良局北潭涌度假營有無得收費泊車

• 交通工具

呢度可以搭巴士係北潭涌站落車 (94, 96R)

1. 北潭涌燒烤區

地點

係停車埸既後方，會見到一大片空地提供比旅遊巴停泊

再往前行，就會見到北潭涌幾隻大字既牌，入面就係燒烤埸啦！

廁所 – 濕廁 (需要行回停車場)

呢個場地比較熱門，所以廁所都特別大過人，就係停車場同小食部右邊；不過由燒烤場行番落黎就要五分鐘左右；呢度亦提供洗手盆作洗食物用。

設施

話明呢度係大！型！燒烤場，設施緊係好多啦！首先黎既就係停車埸隔離，會營業既小食亭 (北潭涌亦係好多行山同露營人士既起點)

係郊區地方買野，價錢都正常

可能附近係地質公國既關係，呢度都有個 3D (我影得非常2D) 佈景比你影下相

而且呢度重有個訪客中心介紹下西貢郊野公園同地質公園等；不過我地五點左右先到，中心 4:30 就收左工

呢度亦有D牌介紹下地質公園，有興趣亦可以計劃前往

之後又介紹番燒烤場入面既設施啦，其實當日不太好天，我都無再往北潭涌上面繼續行，只有係二號場門口門口影左幾張相；漁護署資料顯示2-3號場有66個爐，而再往上行既四號場就有23個，詳程可以睇下面幅圖:

北潭涌區域

沿住呢條路行會有其他燒烤爐

方便指數 :★★★★★ (超大型停車場行兩分鐘，重有小食亭廁所係隔離，只係難D有車位)

設施 :       ★★☆☆☆ (濕廁亦要行到幾遠下, 而燒烤爐既數量亦一般)

熱門程度: ★★★☆☆(泊車地點係附近，但無乜風景可言)

風景:        ★★☆☆☆ (周圍都係樹林)