青馬大橋觀景台

青馬大橋起左咁多年, 每次經過去大嶼山既時候總會見到大大隻字”觀景台”都過門不入, 既然今次有D時間遊車河,泊車亦比較方便, 就順便黎到呢個觀景台影張相, 觀看下青馬大橋既景色; 如果幸運的話重可以見到日落美景添~ 一齊睇睇下面既介紹啦!

青嶼幹線觀景台位於大橋北端, 係呢度可以一次過觀賞欣賞青馬大橋、汲水門大橋同汀九橋全景；觀景台旁邊既青嶼幹線訪客中心就設有展覽, 分別用圖片、影片同模型介紹關於青嶼幹線及青馬大橋的建築過程和機場核心計劃既資訊; 而訪客中心外面擺設青馬大橋既主纜橫切面 , 讓大家可以對青嶼幹線有更深既了解。

青嶼幹線訪客中心

大家係停車場泊好車後 (睇黎真係比較少人去, 當時入去已經係免費泊車 lol) 就會見到呢條天橋:

停車場入面停泊左唔少旅遊巴

行過對面就係觀景台啦! 呢度佔地約18,800平方米(真係好大), 亦都非常乾淨

入到去右手邊就係訪客中心啦! 天氣咁熱真係要入去涼下冷氣先~ 要注意既係訪客中心既開放時間, 咁就唔怕摸門釘啦:

星期一至星期五( 上午十時至下午五時)

星期六、日及公眾假期 ( 上午十時至下午六時半)

星期三休息 (公眾假期的星期三則照常開放)

元旦 、 農曆新年及聖誕假期休息

係訪客中心入面重有好多介紹青馬大橋既展板同電腦問答小遊戲添！

係訪客中心外面都有展出青馬大橋主纜橫切面同組件

青馬大橋觀景台

好啦參觀完訪客中心, 係時候向觀景台出發啦! 首先見到既就係訪客中心旁邊一間賣鐵路有關產品既小店, 係個度可以見到好多玩具小火車路係路軌上行走嫁~

而另外一邊就係一間小食店

好! 睇完觀景台底層周圍後就向上面進發~ 公園周圍真係打理得幾好, 搜尋過先知道原來附近種植大量洋紫荊、羊蹄甲屬、杜鵑花等植物，春天既時候重可以黎呢度欣賞杜鵑花盛開添!

觀景台大約分為三層, 黎到第二層就已經見到青馬大橋啦!

呢度都設有瞭望鏡供遊客使用

亦都有展示青嶼幹線既地圖讓旅客了解呢座咁宏偉既建築物

呢度真係太少人黎, 行極都係見到十個人左右 lol

再向上行就會見到一個大平台, 係呢個就可以飽覽青馬大橋、汲水門大橋同汀九橋全景啦! 等我影多幾張相先!

青馬大橋

汀九橋

黎多張全景先! 係呢度都可以睇到日落, 各位朋友有興趣都可以係度過一個浪漫既下午嫁!

總結

青馬大橋觀景台係一個比較隔涉既地方; 今次都係揸車順路先黎到呢個小景點, 所以唔建議特登黎到呢度。今次都係停留左1.5 小時就離開, 主要都係黎睇青馬大橋既美麗景色; 觀景台開放時間比訪客中心長, 重可以黎到呢度睇埋幾條大橋既夜景, 都係周末可以黎散下步既好地方!

青馬大橋觀景台開放時間

全年開放

星期日至五 (上午七時至晚上十時半)
星期六及公眾假期 (上午七時至翌日凌晨一時半)

駕車前往

• 青馬大橋觀景台停車場地圖

泊車

當時停車場已經無人收錢, 然而政府網站列明既收費如下:

私 家 車 / 電 單 車	首 兩 小 時 每 小 時 十 五 元
由 第 三 小 時 開 始 每 小 時 三 十 元
旅 遊 車 及 其 他 車 輛	首 兩 小 時 每 小 時 二 十 五 元
由 第 三 小 時 開 始 每 小 時 五 十 元