星期日想黎個 morning driving, 不妨揸到鹿頸既茶杯室食個all day breakfast! 揸車沿路上都係岸邊小路, 景色怡人。 一家大小黎既話重可以選擇到鹿頸既釣魚場釣魚, 附近重有一條鹿頸-谷埔既家樂徑, 該徑平路居多, 起終點都係鹿頸; 到達谷埔重有一大片蘆葦草地, 可以帶定相機黎影靚相添!
好多人都鐘意由大埔出發, 經大尾篤及新娘潭路往鹿頸食茶記; 如果想黎個新界區晨操既話不妨考慮下呢個路徑 (不過記住精神夠先好行呀! ), 各位都可以參考下網站內大美督有咩做嫁!
大埔起點 → 大美督 → 新娘潭路 → 鹿頸 → 粉嶺終點
要去鹿頸可以由大埔新娘潭路/ 粉嶺沙頭角路兩邊進入; 前者係雙線雙程, 後者會有單線雙程路既情況出現。今次小編就係由大埔新娘潭路入去等司機哥哥過下車河癮, 沿途都見到好多電單車係度練車。
開多一陣車就會見到停車場啦! 不過泊位比較少, 週末的話可能會難D泊係呢度
鹿頸位於沙頭角海旁, 而係停車場既望向對面會見到深圳既大小梅沙
作為車聚既熱門地, 呢度緊係有好多靚車出沒啦!
係停車場左面就係其中一個車聚熱點發記士多啦! 呢度亦係鹿頸-谷埔家樂徑既入口
入到黎鹿頸緊係要食下呢度既茶座啦! 係停車場右邊分別有兩間餐廳- BB開心茶座同陳鳳記。
BB開心茶座出名既係鹽焗雞, 而兩間茶座都有提供All day breakfast。小編兩間都食過, 認為陳鳳記好味少少, 但係貴過BB開心茶座。不過兩次都掛住食, 唔記得影相lol
如果想睇食評既話, 可以睇番下面既Openrice 食評
餐廳門口都停左好多部車聚緊既電單車
呢度旁邊都有一個釣魚場 (金門海水漁場), 場內可以泊車。
漁場附近環境清幽, 面向山景同農田釣魚係週末既好選擇; 而魚場內有多款魚類, 例如黃立倉、細鱗、盲曹、石斑等等
魚場內提供燒烤爐比各位即烤即食海鮮 (租金100元), 下圖為魚場價目表 (攝於2016年3月)
有興趣黎到呢個魚場的話, 可以瀏覽魚場網站
營業時間: 星期一至日及公眾假期 9:30 – 19:30
除左食野同釣魚， 鹿頸重有一條大約行1.5小時既家樂徑（鹿頸－谷埔來回），沿路靠海之餘重有一大片蘆葦草地比大家影相；有興趣既不妨留多少少時間做下運動，欣賞大自然美景。（圖片來源：Google）
路線：鹿頸 – 雞谷樹下 – 鳳坑 – 谷埔 – 沿路折返
粉嶺港鐵站搭65K綠色小巴到鹿頸總站 (需時30分鐘)
This website uses cookies.
