石澳

窄而急速的彎道令石澳道成為車迷係港島遊車河必到之處； 去到石澳道盡頭更加係老少咸宜既石澳泳灘， 夏日熱辣辣帶住一家大小黎到沙灘ＢＢＱ游水都咪話唔爽！唔想燒烤咁麻煩，石澳亦有大量餐廳選擇，一齊睇下揸到入黎石澳有咩玩啦！

遊車河路線

港島遊車河路線最熟路既就係深淺赤石啦! 今次我地由筲箕灣出發, 香港仔做終點, 以下就係會途經既地方, 大家可以自己click 下其他順路既遊車河地點 :

筲箕灣出發→ 石澳→ 港島大浪灣→ 大潭篤水塘→ 赤柱→ 舂坎角公園→ 淺水灣 → 深水灣 → 香港仔終點

見到條路線都覺得遠呀! 因為呢條係超級熱門遊車河路線, 加上泊位唔係太多, 要停車既話一日之內應該難D去曬所有地點; 所以簡3至4個地點就可以剛好玩足一日啦!

熱辣辣！玩水曬太陽

石澳海灘既水質不錯，沙粒更加係非常細滑，係一個夏季有救生員當值既港島區海灘！不過小編個人就認為浮台好好好好好遠，有次重差D命喪石澳lol

係石澳玩任何水上活動非常方便，除左架車就正正泊左係海灘出面，隔離就係燒烤場外，附近亦有大量士多可以租借水上活動用品，浮床水泡一應俱全；如果車友們自備水上用品，士多亦有付費泵氣服務。

黎到海灘又點少得曬太陽呢！呢個海灘勝在夠大，可以容納好多泳客, 每每夏天成個海灘都插住曬太陽傘；而停車場附近都會有呀姐兜搭你租太陽傘，價錢視乎天氣。

曬到熱熱地飲啖汽水，石澳士多都平過人！3蚊罐邊度搵呀。

玩完水係度都有好多淋浴設備予各位泳客，暑假旺季就唔洗排長龍等沖身啦！

如果家長們帶住小朋友又怕佢地落水危險，燒烤場旁都有一個兒童遊樂場提供比小朋友玩樂。

石澳泳灘資訊

救生員當值時間

夏季（4月至10月）

4月至5月
上午9時至下午6時

6月至8月
星期一至五 － 上午9時至下午6時

星期六、日和公眾假期 － 上午8時至下午7時

9月至10月
上午9時至下午6時

冬季（11月至3月）
泳灘救生服務暫停 （浮台暫時移走以進行保養維修）

查詢電話

2809 4557

石澳泳灘（康樂及文化事務署網站）

石澳泳灘水質（環境保護署網站）

燒烤場

康文署係石澳燒烤場提供燒烤爐39個，爐亦好新淨，係夏天好多呀姐會放把遮係燒烤爐旁，收你$60 大元一把（2014年既事），貴係貴Ｄ，但係咁熱又要對住個爐呢Ｄ錢點都要洗嫁啦。

洗手盆，洗手間，垃圾桶就係燒烤場旁邊，想洗下菜同栗米都好近

兜兜風，嘆碗面先走

淨係想入黎石澳兜下風食下野既話，呢度都有好多好評既餐廳；

首先第一間就係巴士總站右面既 洪記士多 Hung Kei Store (openrice) 。

要注意既係佢地星期二同三休息嫁，唔好揸到入去摸門釘啦！

石澳巴士總站右面跟住呢度入去就係啦！

唔好睇呢度環境一般，其實食物都斤兩十足！黎到呢間洪記士多就梗係要試吓最馳名嘅燒鴨脾啦，不過你知道一隻鴨就得兩隻脾，要叫個燒鴨麵都幾難撞到，就睇下你好無彩啦！當然士多都有得齋叫半隻/四份一隻鴨，咁就滿足到你需要啦~
燒鴨單併 $22 燒鴨脾單併 $ 28

燒鴨充滿油香味，咬落去個陣甘香真係唔係度度有！

佢地既麵都唔少野嫁！湯底清甜又夠濃，而麵亦入口彈牙，配住燒鴨食真係一流呀
揸車入到石澳其實都有其他食肆選擇，小編無一間間去食到( 因為太飽了) , 就只有係門口留影。我到今日先知道呢度有泰國菜：

重有呢間咁有情調既All day breakfast :

各位車友如果想來覓食石澳既話，都可以睇下openrice 既推介:
Openrice 石澳

總結

其實石澳係一個可以令人放慢腳步既地方，除左過黎玩水食野之外，自己一個夜晚揸車過黎海邊聆聽海浪聲，遇上清涼既海風，都係一個減壓既好方法; 希望大家睇完呢篇文章會愛上石澳呢個地方啦！

駕車前往方法

泊車

雖然話就話石澳泳灘有60個免費泊位，但以小編係12月26日（冬天假期）下午黎到都已經爆滿，等左半個鐘都無位，所以想係呢度泊足一日既話就最好10:00 a.m前到達啦。如果各位車迷買齊炭同野食，連爐都霸埋都未有車位既話，係石澳巴士總站對面亦有時租停車場，盛惠30大元1個鐘。

下？連時租停車場都爆埋？我個beach party 點算呀？

唔好咁擔心住！近近地都有以下地方選擇既：

港島大浪灣

揸車注意事項

各位車友黎到條路唔好轉錯