大潭篤水塘

每逢周末,相信各位車迷要諗一個半天既輕鬆遊車河路線都相當頭痕,深淺赤石都遊過曬都真係悶悶地。不過大家有無留意係石澳揸過去赤柱個陣會經過一個水壩頂呢?其實呢個就係擁有多年歷史,係法定古蹟之一既大潭篤水塘水壩啦。今次小編就帶大家由壩頂碌到壩底,見識一下水壩磅礡氣勢。

遊車河路線

港島遊車河路線最熟路既就係深淺赤石啦! 今次我地由筲箕灣出發, 香港仔做終點, 以下就係會途經既地方, 大家可以自己click 下其他順路既遊車河地點 :

筲箕灣出發→ 石澳港島大浪灣→ 大潭篤水塘→ 赤柱→ 舂坎角公園→ 淺水灣 → 深水灣 → 香港仔終點

各位朋友如果由香港仔出發, 調番調行亦得, 但要留意以上泊位唔係太多, 要停車既話一日之內應該難D去曬所有地點; 所以簡3至4個地點就可以剛好玩足一日啦!

沿海小路,欣賞海旁美景

如果大家係筲箕灣出發,就可以首先經過大潭篤水塘壩頂,欣賞兩旁風景。要注意既係呢條路太窄,如果對頭有大車/巴士經過,就要先讓一讓車啦。

係過橋之前會見到有幾們路牌提醒大家讓路

係經過壩頂既時候都可以見到大潭篤水塘既美麗景色啦!

螢幕快照 2016-03-13 下午1.58.14

各位車友係往赤柱方向既時候過左壩頂再行多一陣,就可以係左面斜路落去大潭水塘道,向水塘出發啦!

落到去海邊一直沿海既馬路走就會到大潭篤水塘壩底嫁啦。呢度係單線雙程行車,但避車處比較少,所以各位車友要注意啦!值得一提既係,係香港島真係好少港灣小路,遇上風和日麗既時候,開住窗,吹住海風,欣賞恬靜既景色,呢度真係一個遊車河既好地點。

IMG_5040  IMG_5041

泊車方面,我地都係碌到去盡頭既小型足球場前既一個平地地泊車,其實都唔知呢度可唔可以泊車 lol, 所以各位車友要自己執生。不過都見到在場有幾架車泊左係度,放係度一陣應該問題不大,而未到呢個平地之前都有幾個避車處可以選擇,不過臨走前記住留低聯絡方法啦。

IMG_5015

泊完車就會見到前面有一條小路行入去大潭篤水塘壩底嫁啦

IMG_5020

生態,古蹟一齊遊

原來大潭篤水塘係大潭水務文物徑既其中一部分; 呢條文物徑包含廿多個歷史建築物,而呢條水壩就係1917年建成。由壩頂望落壩底,係美麗既海大潭灣海景,抬頭望上去百呎高既壩頂,見住一架架小汽車係頂上經過,又係另一番景色。當遇上雨季,係壩底重可以見到流水湧出,好似瀑布既美景,令人目不暇給。

IMG_5038

係呢度都見到好多遊人係度影相, 睇黎係一個攝影發燒友必去之處。重有既係原來好多新人都會選擇係呢度取景,唔知呢度既資訊會唔會令你都想黎影埋一份呢?

IMG_5029

其實路既左面係水壩,右面係港島唯一既紅樹林,泥灘上面重可以見到小蟹爬行添。不過要行到紅樹林,要留意天文台既潮漲/退時間。

天文台網站

IMG_5032
由壩底望上去,加埋晴朗既天氣,影既相都特別多呀!

IMG_5034 IMG_5025

係大壩旁邊會見到一個介紹大潭水務文物徑既牌,如果想深入了解呢條文物徑,可以睇下呢兩個網站既介紹:
古物古蹟辦事處
水務署(PDF file)

IMG_5021

呢條路再向上行,就可以見到文物徑既其他景點,需時大約三小時。其實文物徑既其他景點都非常吸引,但要留意呢條徑並唔係兜一圈既路段,有揸車黎就要行返轉頭拎車啦。附上水務署提供既地圖一張。

螢幕快照 2016-03-13 下午4.48.27

  • 總結

大潭水塘遊車河真係好舒服,因為呢度海天一色,加埋茂密既植物,令人relex之餘都可以同親朋瘋狂集郵影相,又可以帶埋自己寵物黎到散步,真係一個短途兜風既好地點。係網上面都見到好多圖文並茂介紹大潭水塘重有好多好靚既風景;可惜小編要睇住架車既關係只能係壩底同附近留影,如果來睇埋既話各位車迷記住繼續留意啦!(笑)

  • 如何前往

前往大潭水塘壩底

  • 泊車

小型足球場旁平地及附近避車處

  • 揸車注意事項

  • 落到呢個分叉位個陣記住要靠左落斜呀!

  • 交通工具

  1. 新巴14號(赤柱炮台(閘口)-嘉亨灣)係大潭道「大潭水塘(北)」落車
  2. 小巴 16A(柴灣站-舂坎角慈氏護養院), 16M (柴灣站-舂坎角), 16X(柴灣站-赤柱)係大潭道「大潭水塘」落車。

沿住水壩方向再樓梯落去(下圖)即可直達。

螢幕快照 2016-03-13 下午5.35.44

Leave a Comment

發佈留言必須填寫的電子郵件地址不會公開。 必填欄位標示為 *