秋風一起, 又黎到露營既好時節啦! 今日小編就推介係粉嶺八仙嶺郊野公園入面, 新界東北最大型既營地 – 鶴藪營地。 呢度有40個營位, 地方寬闊可容納大班人一齊露營, 而且廁所燒烤爐一應俱全, 落車後行五到十分鐘即可到達; 非常適合初次露營/ 一家大小黎到呢度享受秋日既風景嫁! 附近有幾條郊遊徑可供選擇, 不妨黎plan 一個兩天一夜既週末露營活動啦!
交通方便, 適合初階露營者
鶴藪營地既交通非常方便, 揸車前往的話, 由泊車點到營地只需行走5-10分鐘; 上次我地就停係營地下面既馬路一邊。
係呢條路都有好多位置泊到車
如果搭公共交通工具的話就係粉嶺港鐵站搭綠色小巴52B係鶴藪村落車(下圖涼亭)
再沿呢條路行10分鐘左右就到啦!
沿住斜坡向上行就會見到鶴藪營地既指示牌, 再向上行就係八仙嶺; 係週末會見到好多行山客係呢度行落黎
沿樓梯上去即可到達營地, 由落車行到呢度只係15分鐘左右, 真係帶多D野去都整個豪華營都得呀!
營地設施
作為東北區域最大型既營地, 設施都有番咁上下嫁, 不過呢度設施咁齊全, 又正值秋冬露營旺季, 週末就要盡早到場霸位
營地佔地甚廣, 可供多人露營; 惟草地頗硬, 重有好多碎石, 落釘需要執D石頭一下下打落去先得
營區大致分為兩部分, 好多位置都有樹蔭; 下圖係其中一部分
場內燒烤爐同石檯較多, 重有數條晾衫竹係旁邊; 而營內亦見有清潔人員打理
廁所就係營地之內, 入面重有花灑供營友沖涼, 門口亦有洗手盆比大家洗野, 夠曬窩心
要提提大家一定要帶驅蚊產品!
重要既字眼要寫大隻D (因為我痕左成個星期lol, 一落車已經痕到爆)
夜晚既時候就可以見到好多營上既小燈泡開左, 真係好有露營氣氛; 尤其係黎到秋高氣爽既日子, 不妨黎到鶴藪過一個輕鬆既週末
前往鶴藪營地
- 駕車前往, 營地前面的路邊有足夠位置泊車, 或可停泊在鶴藪6號燒烤場旁的停車場
2. 粉嶺港鐵站搭綠色小巴52B到鶴藪村落車, 每隔20-30分鐘一班
鶴藪燒烤地點
1. 鶴藪五號燒烤場
如果營地內既燒烤爐滿左, 露營人士亦可以考慮到營地旁邊既燒烤場
係營地入口既告示牌左邊落去就會見到另一個燒烤場
落到去有8個燒烤爐同石檯,垃圾筒等; 但廁所就要行番上去營地
燒烤場大樹成蔭, 係陽光燦爛既日子亦唔會感到太熱
燒烤場旁邊都有D小設施, 例如係石春路
2. 鶴藪六號燒烤區
如果係鶴藪營地都係無位BBQ 既話, 大家可以行番出鶴藪村, 沿往往市區既路行到呢個燒烤區
假日前往呢度BBQ 既話, 可駕車/ 係粉嶺港鐵站搭綠色小巴52B到漁護署鶴藪管理站落車
呢個區域既燒烤區勝在有廁所, 以及出面有停車場可以泊車
呢個燒烤區有53個燒烤爐, 係假期搵位燒烤一定唔難啦!
呢度活動範圍都好大嫁, 小朋友就可以係草地跑跑跳跳踢下波
前往鶴藪六號燒烤場
- 揸車前往, 旁邊為鶴藪停車場
2. 到粉嶺港鐵站搭綠色小巴52B到漁護署鶴藪管理站落車
行下山, 到郊遊徑鬆一鬆
兩日一夜既行程又點止露營煮下野食咁簡單? 鶴藪係石坳山及八仙嶺屏風山之間的深谷築成, 附近郊遊徑由易都難都有, 今次小編就推介兩條一家大小都岩既郊遊徑比大家:
-
鶴藪水塘家樂徑
全長: 2.5 公里
需時: 1小時
風景: 主要環繞鶴藪水塘一圈, 沿途會經過衛奕信徑的分叉路往八仙嶺，沙螺洞或流水響
係營地出發, 首先沿住石屎路向上走
見到水塘之後可選擇向左/右前進, 右邊係一條 “六十八級” 的陡峭樓梯, 由左面步道進入會無咁吃力
家樂徑地圖; 沿途亦指示清晰, 唔怕迷路
鶴藪水塘屬於灌溉水塘，用作灌溉附近農田; 所以容量只有 18 萬立方米, 面積亦相對較小
鶴藪水塘水壩景觀
此外, 鶴藪營地亦鄰近流水響水塘, 揸車人士可以直接前往, 而露營人士就可以沿家樂徑既分叉路口步行前往
2. 鶴藪郊遊徑
全長: 2.5 公里
需時: 1小時
風景: 由鶴藪村出發, 觀景台上可以遠眺鶴藪谷, 南山及龜頭嶺等田園景色; 終點為鶴藪六號燒烤場, 可沿馬路行回鶴藪村/營地
今次就係鶴藪村小巴站隔離既田園小路出發, 小路旁亦豎立指示牌
沿石屎路入去後就會經過一列列田地;
行15分鐘後就會見到左手面有一條石級路上山; 而旁邊就係郊遊徑既地圖
沿途風景都係樹木為多, 一家大小係夏天登山的話會相對舒服
郊遊徑大部分都係鋪排好既石級
去到路程一半左右就會黎到觀景台
觀景台景致, 路途上會經過幾個電力輸送塔
郊遊徑終點就係鶴藪燒烤場, 如果由燒烤場出發的話可以沿指示牌上山, 係丹竹坑落山
小貼士
如果大家想搭小巴離開, 又係鶴藪村等唔到52B的話, 可以係鶴藪村小巴站右邊既田邊小路一直行到丹竹坑搭56B小巴到粉嶺港鐵站
總結
想要係週末親親大自然既話, 鶴藪對露營新手黎講係一個好選擇; 除左行山之外, 揸車人士可以選擇早上到鹿頸食個早餐 (需時20分鐘); 而且可以到鶴藪附近既田園參觀, 與同行朋友感受一下大自然, 過番個充實既兩天一夜。