扶輪公園營地
大帽山既露營地點真係算香港數一數二方便既營地，行幾分鐘就係洗手間同停車場(係無得沖涼)，重有個小食亭係正隔離，唔記得買野飲都唔洗驚啦！
係洗手間右邊既小路落去
我真係覺得呢度可以做個豪華營呀，因為呢度居然有實木地板同枱同水喉！可以用黎煮飯乘涼
不過呢度地方較小，官方網站話扶輪公園營地得六個營位，真係手快有手慢無
扶輪公園燒烤場
由停車場嘅呢一個入口行入去，沿住左邊行落樓梯，就會到達燒烤場。
根據官方資料，扶輪燒烤場有達55個燒烤爐，並非集中喺一個平地上，睇落都好闊落，夠曬地方比小朋友跑跑跳跳。最重要既係呢度俾樹林包圍，大熱天時有樹蔭遮頭真係舒服好多，不過夏天多蚊，大家記住帶定蚊怕水啦！
燒烤場旁邊亦建有遠足研習徑，全長1公里，大約半小時行得完，沿途景色唔錯，一家大小行都唔會覺得辛苦。
研習徑嘅指示都非常充足，行一個圈就去番停車場
荃錦燒烤場
如果發現扶輪燒烤場滿曬，大家亦可以選擇係正郊野公園對面嘅荃錦燒烤場。呢度比較麻煩嘅就係就係無洗手間，需要去番大帽山郊野公園入面既公廁。旁邊有空地可以泊車，不過位置不多，手快有手慢無。
官方資料顯示荃錦燒烤場共有25個燒烤爐，場地旁邊都種滿大樹，日間BBQ 都好舒服。
燒烤場隔離都有大片空地，可以帶埋羽毛球拍嚟打波添！
交通工具
往大帽山巴士：九巴51號， 於荃灣西鐵路站總站上車，”郊野公園” 站下車，再步行約5分鐘